Dr P Venkatachalam

முதலில் கோவை அரசு பொறியியல் கல்லூரியில் சேர்ந்தேன். வேளாண் பொறியியல் புதிதாக தொடங்கப்பட்டது என்பதாலும், எனக்கு நன்கு பரிச்சியமான தொழில் என்பதனாலும் இந்தப் பாடத்தை தேர்வுசெய்தேன்.அப்போது, ஏன் இப்போதும் வேளாண்மைக் ஒரு சவாலாக இருப்பவை வேளாண் இயந்திரமயமாக்கள் மற்றும் நில நீர் மேலான்மை ஆகும். அவற்றில் வேளாண் இயந்திரமயமாக்களில் எனது முதுகலை பட்டத்தை முடித்தேன்.அப்போது நிலவிய ஆற்றல் பற்றாக்குறையின் அவசியத்தை உணர்ந்து மாற்று ஆற்றலுக்கான தேடல் இருந்ததால், எனது ஆய்வுக்கான தலைப்பை காற்று ஆற்றல் அறுவடையில் தேர்வுசெய்தேன். எனது இந்த ஆய்வு தமிழகத்தில் மட்டுமல்லாது இந்திய அளவில் கற்று ஆற்றல் வளம் குறித்த ஆய்வை தொடங்கிய முதல் ஆய்வாகும். தமிழகத்தின் எந்தெந்த பகுதிகளில், எந்தெந்த மாதங்களில், எந்த அளவில் காற்று ஆற்றல் கிடைக்கிறது என்பதை எனது ஆய்வில் கண்டறிந்தேன். பின்னாட்களில் தமிழகத்தில் காற்று ஆற்றலைப்பயன்படுத்தும் திட்டம்வர எனது ஆய்வு முக்கியப்பங்கு ஆற்றியது. எனது முனைவர் பட்டத்திற்கான ஆய்வை மற்றோர் வற்றாத ஆற்றலான சாண எரிவாயு எனப்படும் கரிம எரிவாயு உற்பத்தியில் மேற்கொண்டேன். அப்போது நான் கால்நடைப் பல்கலைக் கழகத்தில் பணியாற்றி வந்ததும் இதற்கு ஒரு காரணமாகும். எனது இளங்கலைப்பட்டத்தை முடித்ததும் 1979 பிப்ரவரி மாதம் இணை ஆராச்சியாளனாக வேளாண் பல்கலைக் கழகத்தில் சேர்ந்தேன். எனது இளங்கலைப்பட்டத்தில் வேளாண் கழிவுகளில் இருந்து காகித அட்டைகள் செய்யும் ஆய்வுத்திட்டத்தை செய்ததால், எனது முதல் பணியாக வேளாண் கழிவுகளில் இருந்து கோப்புகள் செய்யும் பணி கொடுக்கப்பட்டது. அதை வெற்றிகரமாக செய்து முடித்தேன் .பல்கலைக் கழகத்திற்கு தேவைப்படும் அனைத்து கோப்புகளையும் வாழைக் கழிவு மற்றும் காகிதக் கழிவு கொண்டு செய்து கொடுக்கப்பட்டது. இதற்கிடையே தற்காலிகப் பணியில் இருந்த இணை ஆராச்சசியாளர்களை நிரந்தரப் பணியாக்க வேண்டும் என்ற போராட்டத்தை, நாங்கள் சங்கம் அமைத்துப் போராட தொடங்கி இருந்தோம். இணை ஆராச்சியாளர்கள் சங்கத்தில் நானும் எனது நண்பர்களும் முக்கியப் பங்காற்றினோம், அதன் காரணமாக நான் பாண்டிச்சேரியில் இருந்த வேளாண் அறிவியல் நிலையத்திற்கு மாற்றப் பட்டேன். அகில இந்தி அளவில் தொடங்கப்பட்ட முதல் அறிவியல் நிலையம் என்பதால் பல உள்கட்டுமானங்களை ஏற்படுத்தும் பணியை செய்யும் பணி எனக்கு கொடுக்கப்பட்டது. முதன்மைக் கட்டிடம் உட்பட அனைத்து கட்டுமானங்களும் எனது காலத்தில் கட்டப்பட்டன.

மீண்டும் எனது முதுகலைப்பட்டத்திற்காக கோவைக்கு பணிமாற்றம் செய்யப்பட்டேன்.இந்தக் காலத்தில் தான் நான் காற்று ஆற்றலின் வளம் மற்றும் அதன் சாத்தியக் கூறு குறித்த ஆய்விகளை மேற்கொண்டேன். மேலும் இத்தக்காலத்தை, கல்வி பற்றிய புதிய அறிதல் பெற்ற காலம் என்று கூறலாம். கல்வியை வேலைக்கான அடையாளச் சீட்டாக எண்ணியிருந்தேன், இல்லை அது சமூக மாற்றத்திற்கான ஒன்று என அறிந்தேன். அன்று அரசு பணிக்கான ஆட்களை உற்பத்தி செய்யும் பணிய கல்லூரிகளுக்கு இருந்தது. இன்று தொழில் கல்வி என்ற பெயரில் பில்கேட் போன்றவர்களுக்கான வேலையாட்களை உற்பத்தி செய்யும் பணியாக மாறியுள்ளது. ஒவ்வொரு கல்வியாளரும் அரசியல்வாதியாகவும், கலைஞராகவும் இருக்கவேண்டும் என உணர்ந்தேன். அதையே இறுதிவரை பின்பற்றி வருகின்றேன். அதன் பின் நான் காட்டுப்பாக்கத்தில் கால்நடைப் பல்கலைக் கழகத்தின் கீழ் இருந்த வேளாண் அறிவியல் நிலையத்திற்கு பணிமாற்றம் செய்யப்பட்டேன். இங்குதான், வேளாண் விரிவாக்கம் பற்றியும், உழவர்களின் உண்மையான தேவைகள் குறித்தும் அறிந்துகொள்ள அரிய வாய்ப்புகள் கிடைக்கப்பெற்றேன். மேலும், இங்குதான் கிராமங்களுக்கும் ஆராச்சி நிறுவனங்களுக்கும் தொடர்பினை எற்படுத்தும் திட்டத்தை நடைமுறைப் படுத்தினோம். இங்கு பணியாற்றிய நான்கு ஆண்டுகளில் வேளாண்மையில் கால்நடைகளின் பங்குபற்றி கற்றுக்கொள்ளும் வாய்ப்பு கிடைத்தது.அதன் பின்னர் மீண்டும் கோவைக்கு மாற்றப்பட்டேன்.

இங்கு பணியாற்றிய பதினான்கு ஆண்டுகளே எனது பல்கலைக் கழக வாழ்வில் அதிமுக்கியமான காலமாகும். ஆற்றல் பூங்காவில் தொடங்கி பல்வேறு ஆற்றல் திட்டங்களை நிரைவேற்றினேன்.இங்கு எனது துறையில் அமைந்த குழு கூட்டுப்பணிக்கு சிறந்த உதாரணமாகும். எனது பணி குறிப்பாக வெப்ப எரிவாயு கலன், எரிகரி உற்பத்தி, சூரிய வெப்ப ஆற்றல் கருவிகள் மற்றும் ஆற்றல் தணிக்கை போன்றவற்றில் இருந்தன. இந்தக் காலகட்டத்தில் தான்,ஆற்றல் மற்றும் சுற்றுச்சூழல் பொறியியலில் இளங்கலைப்பட்டம் தொடங்கப்பட்டது. பல ஆய்வுத் திட்டங்களைக் கொண்டுவந்து, அவற்றைச் சிறப்பாக முடித்து, பல தொழில்நுட்பங்களை உழவர்களுக்குக் கொண்டுசென்றது, இந்தக் இக்காலத்தில் தான். இதில் ஆறு ஆண்டுகள் துறையின் தலைவராக இருந்தது எனது ஆய்வுத்திட்டங்களை நிறைவேற்ற உதவியாக இருந்தது.மேலும் இதே காலகட்டத்தில் விடுதிக்காப்பாளனாகவும் இருந்தேன். அந்தப்பணி எனது மனித உறவுகள் சார்ந்த எண்ணங்களை நடைமுறைப்படுத்த பெரிதும் உதவியது என்று கூறலாம். புதிய விடுதிகள் கட்டியது,பழைய விடுதிகளைப் புதுப்பித்தது, ஊழியர்களை நிரந்தரமாக்கியது,மாணவர்களிடையே நாளிதழ்கள் படிக்கும் பழக்கத்தை ஏற்படுத்தியது, ஆற்றல் சேமிப்போடு வற்றாத ஆற்றலை அறிமுகப்படுத்தியது என பலபணிகள் இன்னும் என்னை அங்கு நினைவுபடுத்திக் கொண்டுள்ளன. பணிக் காலங்களில் எனது மேல் அதிகாரிகளாக வந்த முனைவர் கஜேந்திரன் ,முனைவர் சம்பத்ராஜன் மற்றும் துணைவேந்தராக இருந்த முனைவர் சி. இராமசாமி ஆகியோர் பகுத்தறிவுவாதிகளாக இருந்தது எனக்கு பேருதவியாக இருந்தது.

என் பணியின் இறுதிக்காலங்களில் பல இடையூறுகளை எதிர்கொள்ள வேண்டி இருந்தது, எனினும் அவற்றை அனுபவங்களாக எடுத்திக்கொண்டேன். பல முறை பணியிடங்கள் மாற்றம், ஆய்வுத்திட்டங்களை மற்றவர்களுக்கு மாற்றியது,முதுகலை மற்றும் முனைவர் பட்டமாணவர்களுக்கு வழிகாட்டியாக இருக்க அனுமதிக்க மறுத்தது, எனது துறையில் பணியாற்றும் வாய்ப்பைப்பறித்தது, போன்ற சில வற்றை குறிப்பிடலாம்.

ஓய்வுக்குப் பின் எனது பணிகள் பன்மடங்கு அதிகரித்துள்ளன. இரண்டு கல்லூரிகளுக்கும், இரண்டு பல்கலைக் கழகங்களுக்கும் ஆலோசகராக இருக்கின்றேன். இவற்றுடன் எப்போதும் போல் படிப்பது, எழுதுவது என்ற என் விருப்பத்தைத் தொடர்கின்றேன். எங்களுக்கான காய்கறி மற்றும் பழங்களை நாங்களே உற்பத்தி செய்துகொள்கின்றோம். பத்திரிக்கைத்துறை,திரைப்படத்துறை மற்றும் சில ஆற்றல் சார்ந்த தொழில்துறை நண்பர்களிடம் எனது கருத்துக்களையும் பகிர்ந்துகொள்கின்றேன்.